राज्यातील ग्रामपंचायतीतील पोटनिवडणुकांची तारीख आली, या दिवशी मतदान होणार

राज्यभरातील सुमारे 2 हजार 620 ग्रामपंचायतीतील 3 हजार 666 सदस्य आणि 126 थेट सरपंचांच्या रिक्तपदांचा पोटनिवणुकांसाठी 18 मे 2023 रोजी मतदान होणार आहे, अशी माहिती राज्य निवडणूक आयोगातर्फे आज येथे देण्यात आली.

राज्यातील विविध ग्रामपंचायतीमधील निधन, राजीनामा, अपात्र ठरणे किंवा अन्य कारणांमुळे रिक्त झालेल्या सदस्य आणि थेट सरपंचपदांच्या पोटनिवडणुकांसाठी हे मतदान होत आहे.

अशी असेल प्रक्रिया

25 एप्रिल ते 2 मे या कालावधीमध्ये अर्ज दाखल करता येणार
अर्जाची छाननी 3 मे 2023 रोजी होईल
8 मे 2023 रोजी दुपारी 3 वाजेपर्यंत अर्ज मागे घेता येतील.
त्याच दिवशी निवडणूक चिन्हांचे वाटप करण्यात येईल.
18 मे 2023 रोजी सकाळी 7.30 ते सायंकाळी 5.30 या वेळेत मतदान होईल.
मतमोजणी 19 मे 2023 रोजी होईल.

विशेष सूचना

नक्षलग्रस्त व दुर्गम भागात मात्र दुपारी 3 वाजेपर्यंतच मतदानाची वेळ असेल. 
सार्वजनिक सुट्टीच्या दिवशी नामनिर्देशनपत्रे दाखल करता येणार नाहीत.