हजार, लाख की कोटी... तुम्ही घरात किती कॅश ठेवू शकता?

आयकर नियमानुसार, जर तुमच्या घरी बेहिशोबी रक्कम सापडली तर त्यावर 137 टक्के कर लागू शकतो. 

आयकरच्या नव्या नियमानुसार, कोणी घरात किती प्रमाणात कॅश ठेवावी याची कोणतीही मर्यादा नाही. तुम्ही तुमच्या घरात कितीही कॅश ठेवू शकता, फक्त ठेवलेल्या प्रत्येक पैशाची नोंद तुमच्याकडे असावी, तो पैसा कुठून कमावला आणि तुम्ही त्यावर किती कर भरला याचा पुरावा तुमच्याकडे असावा.

तुम्ही आयटीआर भरला आहे का याचा पुरावा असावा. या गोष्टी जर तुमच्याकडे नसतील तर तुमच्यावर कारवाई होऊ शकते.सेंट्रल बोर्ड ऑफ डायरेक्ट टॅक्सच्या नियमानुसार, तुम्ही जर 50,000 रुपयांच्या वर रक्कम डिपॉजिट करत असाल किंवा ती बँकेतून काढत असाल तर तुम्हाला तुमचे पॅन कार्ड दाखवावे लागेल.

कॅश ट्रान्सफर करताना या गोष्टी तुम्हाला माहिती हव्यात

• तुम्ही कुणाकडूनही 20,000 पेक्षा जास्त रुपयांचं कर्ज हे कॅश स्वरुपात घेऊ शकत नाही.
• तुम्हाला जर दान करायचं असेल तर दोन हजाराहून अधिक रुपये तुम्ही कॅशच्या स्वरुपात दान करु शकत नाही. 
• काहीतरी खरेदी करायचं असेल तर दोन लाखाहून अधिक कॅश तुम्ही देऊ शकत नाही. जर ही खरेदी करायची असेल तर तुम्हाला पॅन कार्ड आणि आधार कार्ड दाखवावं लागेल. 
• एका वर्षात तुम्ही बँकेतून एक कोटीहून अधिक रक्कम काढली तर त्यावर दोन टक्के टीडीएस (TDS) भरावा लागेल. 
• एका वर्षात 20 लाखाहून अधिक पैशाच्या व्यवहारावर तुम्हाला दंड लागू शकतो. 30 लाखांच्या वरील खरेदी-विक्रीचे व्यवहार केल्यास त्याचा तपास होऊ शकतो.
• क्रेडिट कार्ड किंवा डेबिट कार्डच्या माध्यमातून एक लाखाहून अधिक व्यवहार केल्यास त्याचा तपास होऊ शकतो.